📅 10 FEBREIRO: FORMACIÓN NO CENTRO (by @paula_cernadas)

     Ola de novo! 👋

    Levabamos tempo sen falarvos da nosa experiencia de difusión do curso feito con @russell1955 en decembro do pasado ano. Daquela nacera unha nova semente no corazón dos 15 participantes na formación que nos tivo compartindo convosco todas as novidades a diario.

    Pasado o nadal e a resaca das uvas, voltamos aos nosos centros con folgos renovados e o desexo de partillar todo o aprendido. Porén, o fin do cuadrimestre bulía nas nosas testas. Irremediablemente chegaban as probas de progreso e, ademais, tocaba organizar a xuntanza virtual de representantes do alumnado. Porque si! temos presidente neste ano tan incerto e o noso alumnado será quen de transmitir as súas inquedanzas a través deste mediador tan entusiasta que é Xoán Xosé Pastoriza!

    Coas probas á volta da esquina, tivemos que retomar ás aulas telemáticas. A alarma sanitaria non deixaba outra opción. Ensino en remoto que, de novo, reduce as horas de descanso e nos dilata as meniñas dos ollos sen remedio. Xa non son quen de quitar os lentes para a presbicia e non vivo sen os meus cascos bluetooth, a miña cámara de alta resolución e o almacenamento de contido na nube... modernidades que teñen vido para quedarse a profundizar no ensino mixto, no semipresencial, no híbrido, no ensino en-liña... cantas modalidades para unha soa docente!. Darei feito?

    Pero adaptámonos e continuamos. E nese camiño hoxe 10 de febreiro tocou alentar aos nosos compañeiros e compañeiras na @eoi_pontevedra. Compartir as experiencias daquel curso en decembro e descubrir que non estamos aillados nen ailladas. Imos da man e camiñamos xuntos para deixar unha pegada colectiva no noso alumnado.

    Velaquí a presentación que @Mery_Fer23 e máis eu detallamos polo miúdo. Hai ligazóns aos perfís máis destacables da formación, reflexións colaborativas, vídeos explicativos, portafolios dixitais e unha morea de artefactos que consultar. Pero, sobre todo, hai gañas; desexo de seguir aprendendo e continuar contaxiando... porque somos profes de linguas e cando ensinamos, aprendemos!